Unga fólkið er framtíðin

Á réttum forsendum

Innan Hugarafls starfar hópur sem heitir Unghugar Hugarafls og er hugsaður fyrir fólk á aldrinum 18-30 ára. Unghugar voru stofnaðir með það í huga að mæta þörfum ungs fólks sem hefur upplifað andlegar áskoranir. Það er algengt að upplifa félagslega einangrun eftir að hafa glímt við andlega erfiðleika og erfitt getur verið að feta veginn aftur út í lífið. Sumir Unghugar eru að glíma við andlegar áskoranir á meðan aðrir eru á batavegi. Sumir hafa náð að halda áfram námi eða starfi í bataferlinu, aðrir eru í fullri vinnu við að vinna í sjálfum sér. Þessa ungu einstaklinga vantar oft vettvang til þess að hitta annað ungt fólk sem er í svipuðum sporum eða hefur svipaða reynslu að baki. Unghugar geta verið sá vettvangur. 

Nokkrir ungir notendur geðheilbrigðiskerfisins innan Hugarafls tóku sig saman og þann 24. ágúst 2009 var stofnfundur Unghuga haldinn. Nafnið Unghugar Hugarafls varð fyrir valinu og að mati hópsins varð vísunin til Hugarafls að koma fram. Unghugar starfa einnig innan Hugarafls og eftir sömu starfsreglum og Hugarafl, með jafningjagrunn og valdeflingu að leiðarljósi.

Unghugar hafa haft ýmislegt fyrir stafni en það sem stendur þó upp úr eru persónulegu framfarir ýmissa einstaklinga innan hópsins og vinaböndin sem hafa myndast. Það er ótrúlegur sigur að sjá einstakling sem hefur glímt við mikla félagsfælni taka til máls ófeiminn eða jafnvel hlæja hástöfum.

Svipmyndir úr starfi unghuga
Reglulegir fundir

Fjölbreytt og hvetjandi starf

Starfsemi Unghuga fer fram á reglulegum fundum á miðvikudögum kl.10:00-12:00. Félagsleg dagskrá utan hefðbundins tíma er auglýst sérstaklega innan hópsins. Dagskrá Hugararfls er opin Unghugum og við hvetjum alla sem taka þátt að nýta einnig hópastarfið. Að loknu nýliðaferli eru þátttakendur boðnir inn í alla starfsemi og er hver og einn hvattur til að nýta sér það sem hentar best þeirra aðstæðum.

Símanúmer: 4141550. Vinsamlegast látið okkur vita ef þið hafið áhuga á að slást með í för. Áhugasamir geta fengið kynningu á starfinu á fimmtudögum klukkan 13:00. Svava Arnardóttir iðjuþjálfi starfar með hópnum. Hægt er að senda okkur póst á hugarafl@hugarafl.is og óska eftir kynningu.

Samstarf við Erasmus+