Í hópnum er rætt um meðvirkni og áhrif hennar á daglegt líf. Unnið er með sjálfsskoðun og viðhorf til sjálfsins með það að markmiði að auka meðvitund og styðja við bataferlið. Guffa heldur utan um hópinn.

Markmið hópsins eru umræður og fræðsla um markmið og leiðir í lyfjamálum. Að verða margs vísari um geðlyf, aukaverkanir þeirra og fráhvörf, að verða meðvitaðri um leiðir geðheilbrigðiskerfisins til sjúkdómsvæðingar og lyfjanotkun, að fræðast um hvaða hlutverki lyfin gegna eða gegna ekki í bataferli, að fræðast um leiðir til niðurtröppunar og að öðlast þekkingu á “landslagi” lyfjamála í þeim löndum sem við berum okkur saman við. Í hópnum eru ræddar margs konar leiðir; miðlað er þekkingu um lyf og áhrif þeirra á líkama og sál, efld er þekking á öðrum leiðum og þær bornar saman, aukin er þekking hópsins á lyfjaniðurtröppun og mismunandi úrræðum/leiðum sem er að finna víða erlendis, miðlað er persónulegri reynslu af lyfjum og áhrifum þeirra á hvern og einn og kynnt er hvort fyrir öðru hvaða hlutverk þau hafa haft í bataferlinu. Óskað er eftir virkri þátttöku og æskilegt að hvert og eitt miðli sinni reynslu um málefnið. Auður sér um hópinn.

20 mínútur þar sem Rakel leiðir hugleiðslu til að gefa líkama og huga slökun frá amstri dagsins.

Hvað er Bati? Hvað þarf til þess að ná Bata? Guffa leiðir hópinn í þessari lotu.

Unghugar er opinn hópur ungmenna á aldrinum 18 til 30 ára sem vilja taka þátt í styrkjandi og uppbyggilegri samveru með jafnöldrum. Á þriðjudögum hittumst við uppi í Garðarshólma (risi) og einblínum á batamiðaða samveru þar sem við leggjum mikla áherslu á tengslamyndun, bata og félagslega virkni í öruggu og stuðningsríku rými. Alexander og Blær sjá um hópinn.

Hópur fyrir fólk til að gera myndlist saman, skapa og æfa sig áfram. Maður þarf ekkert að kunna á myndlist til að taka þátt. þetta er rólegur hópur sem er aðallega um valdeflingu og að tengjast sjálfum sér í gegnum sköpun. Hópstjóri er Emil Dagur.