Gáttaþefur, Gluggagægir og Grýla skreyta jólakortin frá Hugarafli þetta árið.
Líkt og í fyrra er Hugarafl með jólakort til sölu og rennur allur ágóði sölunnar í að styrkja og efla starfið innan Hugarafls. Kortin eru hönnuð af Edduverðlaunahafanum Stefáni Jörgen Ágústsyni sem er virkur meðlimur í Hugarafli. Stefán hefur komið víða við á 26 árum sem listamaður. Hann byrjaði 12 ára að gera grímur og brúður og 2009 fór hann að nýta sér tölvugrafík við hönnun á sínum skúlptúrum. Stefán hefur unnið við kvikmyndir svo sem Mýrina, Wolfman og Edduna fékk hann fyrir Good Heart þar sem hann sá um skurðaðgerðarsenuna. Í samtali við Stefán sagðist hann hafa gripið tækifærið um leið og honum bauðst til að styrkja Hugarafl með hönnun á jólakortunum. Hann er innilega þakklátur fyrir það góða starf sem unnið er í Hugarafli og skiptir það hann miklu máli að geta gefið til baka á þennan hátt.
Kortin er hægt að kaupa í Hugarafli, Borgartúni 22. Hægt er að kaupa stök kort á 100 krónur, 6 kort saman í pakkningu á 500 krónur eða 12 kort saman á 1.000 krónur. Umslög fylgja með í pakkningunum.
