Eins og fram hefur komið voru starfsdagar í Hugarafli fimmtudaginn 4. og föstudaginn 5. febrúar. Almenn ánægja var með fyrirkomulagið á starfsdögum þó svo að þeir hafi verið með talsvert öðru sniði en oft áður. Að þessu sinni var ákveðið að fara í svokallaða SVÓT greiningu þar sem safnað var saman upplýsingum frá Hugaraflsfólki um innri og ytri þætti sem áhrif hafa á starf félagsins. Við greininguna varð meðal annars til listi yfir styrkleika og veikleika og einnig listi yfir ógnanir og tækifæri í ytra umhverfi. Alls voru 4 hópar sem tóku þátt í þessa greiningu og voru 4-5 í hverjum hópi.
Ákveðið var að halda vinnu með þessi atriði áfram og nýta betur til að móta starf Hugarafls. Hópurinn sem tók þátt í starfsdögum mun því hittast aftur mánudaginn 15. febrúar, klukkan 13:00 og vinna í sameiningu í anda valdeflingar að því að efla og móta starf Hugarafls til framtíðar.
