Fréttir

Viðfangsefni vísindamanns gerð spennandi

By desember 12, 2005 No Comments
12. desember 2005 | Innlendar fréttir | 567 orð | 2 myndir

Mynd um störf Svend Richter hlutskörpust í stuttmyndasamkeppni Rannís og Lífsmynda

Vignir Már Lýðsson og Ingvar Haukur Guðmundsson, nemendur við Menntaskólann í Reykjavík.

Vignir Már Lýðsson og Ingvar Haukur Guðmundsson, nemendur við Menntaskólann í Reykjavík.
Hluti Amator Film-hópsins, Arnfríður Ragna Sigurjónsdóttir, Katrín Jónsdóttir, Guðný Elísabet Ólafsdóttir ásamt Emblu Ragnarsdóttur.
Eftir Sigurhönnu Kristinsdóttur sigurhanna@mbl.is STUTTMYNDIN Svend Richter bar sigur úr býtum í stuttmyndasamkeppni Rannís og Lífsmynda um líf og störf vísindamanna.
Eftir Sigurhönnu Kristinsdóttur sigurhanna@mbl.is
STUTTMYNDIN Svend Richter bar sigur úr býtum í stuttmyndasamkeppni Rannís og Lífsmynda um líf og störf vísindamanna. Að sögn Vignis Más Lýðssonar, eins höfunda myndarinnar, er sagt frá starfi Svend í meginmáli og greint frá rannsóknum hans á höfuðkúpum frá landsnámsöld en Svend er lektor við tannlæknadeild Háskóla Íslands og kennir munngervalækningar ásamt því að stunda rannsóknir.Myndina vann Vignir ásamt Ingvari Hauki Guðmundssyni en báðir eru þeir nemendur við Menntaskólann í Reykjavík. Spurður um ástæðu þess að þeir tóku þátt í keppninni segir Vignir að þeir félagar hafi viljað koma sér á framfæri og auglýsa sig sem kvikmyndagerðarmenn. Nú geti þeir byrjað að vinna að stærri málum því fartölvu sem þeir fengu í verðlaun ætli þeir að skipta í betri græjur til kvikmyndagerðar.Í umsögn dómnefndar um stuttmyndina segir: „Farið er yfir fjölbreytt verkefni vísindamannsins sem tengjast bæði kennslu á háskólastigi og fornmeinafræðilegum rannsóknarstörfum… Viðfangsefni vísindamannsins eru með þessum hætti bæði gerð spennandi og sannfærandi, auk þess sem menntun hans er gerð eftirsóknarverð.“Stuttmyndakeppnin var haldin í tengslum við verkefnið Vísindin snerta þig sem Rannsóknamiðstöð Íslands, Rannís, stóð fyrir á haustmánuðum. Markmið verkefnisins er að upplýsa ungt fólk um þau tækifæri sem gefast í heimi vísindanna og sýna fram á að vísindi eru ekki lokaður heimur heldur lifandi veruleiki sem snertir okkur öll.Þátttökumyndir áttu að vera í heimildamyndastíl, fjalla um dagleg störf vísindafólks í fyrirtækjum, háskólum eða rannsóknastofnunum og vera 8-10 mínútur.

 

Meingenaleit

Í öðru sæti var hópur nemenda úr Iðnskólanum í Reykjavík sem gerði myndina Dr. Doddi, þau Ásta María Sigmarsdóttir, Daði Daðason, Einar Thorberg Guðmundsson og Ilija Tisma. Öll eru þau nemendur á upplýsinga- og fjölmiðlabraut skólans og að sögn Ástu Maríu unnu allir nemendur í faginu Vefsíðugerð, myndbandagerð og myndvinnsla stuttmynd eftir stöðlum keppninnar og svo hafi hver hópur fyrir sig ákveðið hvort hann vildi senda myndina í keppnina.

Ásta María segir hópinn hafa ákveðið að fylgjast með Þórarni Blöndal sem vinnur við meingenaleit hjá Íslenskri erfðagreiningu. Í myndinni tekur hópurinn viðtal við Þórarin og fylgist með störfum hans sem ganga út á að finna gen sem valda sjúkdómum, segir Ásta María. Hún segir að hópnum hafi fundist meingenaleit áhugavert umfjöllunarefni vegna þess að ekki sé mikið talað um það í samfélaginu. Hópurinn fékk fartölvu í verðlaun.

 

Óhefðbundinn vísindamaður

Þær Arnfríður Ragna Sigurjónsdóttir, Guðný Elísabet Óladóttir, Katrín Jónsdóttir og Sif Hermannsdóttir, sendu inn myndina Why be Normal sem vann til þriðju verðlauna. Hópurinn er einnig við nám í Iðnskólanum í Reykjavík og vann myndina sem verkefni fyrir skólann. Fjallar mynd þeirra um Elínu Ebbu Ásmundsdóttur geðiðjuþjálfa. Segir Guðný Elísabet að þeim stöllum hafi fundist sniðugt að taka fyrir óhefðbundinn vísindamann, ekki þann vísindamann sem vinnur inni á rannsóknarstofu.

Í myndinni er talað við Elínu Ebbu og fylgst með henni þar sem hún fer í heimsókn til skjólstæðings en rannsóknarvinna hennar fer að mestu leyti fram heima hjá þeim. Elín Ebba hefur í fjölda ára unnið með geðsjúkum og með þeirra hjálp rannsakað og leitað leiða til að bæta líf þeirra. Hún er þátttakandi í verkefninu Hugarafl sem vinnur að verkefnum til að bæta geðheilbrigðisþjónustu. Hópurinn fékk stafræna myndavél í verðlaun og segir Guðný Elísabet að þá myndavél ætli hópurinn að gefa áfram til Hugarafls.

Með myndinni vildi hópurinn vekja upp umræðu um þennan hóp fólks, þ.e. fólk sem á við geðræn vandamál að stríða. Segir Guðný Elísabet að umræðan sé oft lítil og neikvæð um þessi mál.