1.grein

Nafn og tengsl

Heiti félagsins er Hugarafl. Aðsetur Hugarafls er Borgartún 22, 2.hæð, 105 Reykjavík.

Hópurinn var stofnaður af:
Auði Axelsdóttur,
Garðari Jónassyni,
Hallgrími Björgvinssyni,
Jóni Ara Arasyni og
Ragnhildi Bragadóttur.

Þrír af stofnendum Hugarafls eru látnir þ.e. Garðar Jónasson, Hallgrímur Björgvinsson og Ragnhildur Bragadóttir og einn stofnandi er hættur, Jón Ari Arason.

Rúmrask við geðdeild.

Stjórnin leggur áherslu á að tryggja að hugsjón, markmið og saga félagsins glatist ekki. Hópurinn starfar sjálfstætt í nánu samstarfi við fagaðila Geðheilsu-Eftirfylgdar. Einnig er gert ráð fyrir að reglulegt samstarf fari fram við aðra fagaðila innan sem utan kerfis sem láta sig geðheilbrigðismál varða.

2. grein

Markmið

Aðalmarkmið Hugarafls er að hafa jákvæð áhrif á íslenskt geðheilbrigðiskerfi. Einnig eru markmið samtakanna eftirfarandi:

  • að uppræta fordóma í íslensku samfélagi
  • að efla hlutverk og þátttöku einstaklinga sem eru að efla geðheilsu sína í samfélaginu
  • að efla þekkingu almennings og fagfólks á bataferli einstaklinga sem eru að efla geðheilsu sína
  • að kynna og starfa eftir hugmyndafræði valdeflingar og batamódelsins
  • að starfrækja og þróa þjónustu og úrræði fyrir einstaklinga sem eru að efla geðheilsu sína samkvæmt ofangreindri hugmyndafræði.

Hugarafl nýtir reynslu einstaklinga sem eru að efla geðheilsu sína og menntun og reynslu fagfólks hjá Geðheilsu-eftirfylgd til að koma markmiðum sínum á framfæri. Reynslan er sett í farveg og nýtt til að efla og bæta þjónustu, að efla virðingu í kerfinu öllu (heilbrigðis-og velferðarkerfi) og til að stuðla að áframhaldandi þróun í þessa átt. Hugarafl getur einnig sinnt lokuðum verkefnum í samstarfi við t.d. sveitarfélög. Hugarafl nýtir verkefni, samstarf fagfólks og notenda, sýnileika Hugaraflsfólks og notendastýrða endurhæfingu Borgartúni 22, til að vinna að markmiðum sínum.

3. grein

Stjórn, starfsemi og ráðstöfun fjár

Sjö manna stjórn er kosin á aðalfundi félagsins sem haldinn er ár hvert auk tveggja varamanna. Stjórnarmeðlimir skipta með sér verkum þannig að skipaður er stjórnarformaður, gjaldkeri, ritari og meðstjórnendur.

Fjármál og samstarf við endurskoðanda er á ábyrgð stjórnar. Fjármál og fjárútlát eru rædd opið á Hugaraflsfundum. Minni háttar ákvarðanir við fjárútlát eru tekin á Hugaraflsfundum en stærri fjárútlát eru ákveðin í samráði við stjórn og með samþykki stjórnar. Fjármál eru á ábyrgð stjórnar. Fjárframlögum er ætlað að standa undir starfssemi Hugarafls sem ávallt byggir á markmiðum og hugmyndafræði. Einnig stuðlar Hugaraflshópurinn (virkir Hugaraflsfélagar), og stjórn að mótun nýrra verkefna og fjáröflun til þeirra.

Hlutverk stjórnar er einnig að gæta þess að unnið sé samkvæmt markmiðum og hugmyndafræði Hugarafls. Stjórn tekur ábyrgð á að varðveita sögu Hugarafls og þau markmið sem stofnendur lögðu upp með. Stjórnin ber einnig ábyrgð á að stuðla að því að hugsjónin sé öllum kunn og höfð í heiðri á hverjum tíma. Stjórnarmenn þurfa að vera til fyrirmyndar varðandi ofangreind atriði og ávallt fara eftir lögum Hugarafls, og fylgja verklags- og húsreglum í hvívetna.

Ef upp kemur erfið ákvarðanataka sem gæti klofið Hugaraflshópinn eða skapað meiri háttar erfiðleika innan Hugarafls, tekur stjórn að sér ákvarðanatöku og ábyrgð á henni gagnvart félagsmönnum og öðrum sem málið kann að varða. Þá vísar Hugaraflhópurinn ákvarðanatöku sem ekki var hægt að leysa á Hugaraflsfundum til stjórnar að loknum umræðum á Hugaraflsfundi .

Ef alvarleg áföll eiga sér stað sem erfitt er fyrir Hugaraflshópinn að leysa, er hægt að vísa því til stjórnar. Stjórn ræðir málið, kemur með tillögur að úrvinnslu og tekur jafnframt ábyrgð á að útfæra tillögur í takt við hugmyndafræði og markmið Hugarafls, með heill starfshópsins að leiðarljósi.

Þeir sem bjóða sig fram til stjórnar þurfa að þekkja vel innviði starfsins og vera vel að sér í
hugmyndafræði Hugarafls. Þeir þurfa einnig að hafa verið virkir á Hugaraflsfundum í a.m.k ár. hafa verið til fyrirmyndar og ávallt farið eftir og virt verklags-og húsreglur félagsins .

Í stjórn skal ávallt vera einn meðlimur frá unghugum ef þeir eru starfandi innan Hugarafls þegar stjórn er mynduð.

4.grein

Fjárframlög

Fjárframlög geta komið frá ríki, borg, sveitarfélögum, og frjálsum framlögum fyrirtækja og einstaklinga. Einnig kemur fjármagn inn með ýmsum fjáröflunum og þátttöku í viðburðum eins og Reykjavíkurmaraþoni.

Stjórn og verkefnastjórar sjá um að sótt sé reglulega um opinbera styrki og tekur ábyrgð á öðrum umsóknum um styrki og hvetur félagsmenn til árvekni um fjármál og umsóknir.

Skrifað undir samning í Velferðarráðuneytinu 2017.
5. grein

Félagsgjöld og þátttaka félagsmanna

Félagar í Hugarafli þurfa að virða verklags- og húsreglur félagsins í hvívetna. Allir félagsmenn þurfa að sýna almennt siðferði, kurteisi vinsemd og virðingu.

Ef félagsmaður fer ekki eftir ofangreindu eða brýtur reglur félagsins fær hann aðvörun, ef félagsmaður virðir ekki aðvörun og bætir sig ekki á neinn hátt er stjórn heimilt að vísa viðkomandi úr félaginu.

Félagsmaður sem hefur verið fjarverandi frá starfinu í 6 mánuði eða lengur og vill byrja aftur, þarf til að geta stundað fundi og grúppur að fara í viðtal. Annaðhvort við stjórnarmann eða starfsmann Hugarafls. Tilgangur þessa viðtala er að kynna mögulegar breytingar sem orðið hafa á starfinu og viðra væntingar og markmið.

Félagsmaður sem hefur ekki verið virkur í starfi Hugarafls í 3 mánuði eða lengur fyrir aðalfund hefur ekki atkvæðarétt í kosningum á aðalfundi félagsins.

Félagsmenn greiða ekki félagsgjöld og er þjónustan á vegum Hugarafls að kostnaðarlausu fyrir utan einstaka lokuð námskeið.

6. grein

Aðalfundur

Aðalfundur Hugarafls fer með æðsta vald í málefnum félagsins. Aðalfund skal halda árlega og eigi síðar en 1. september ár hvert. Til aðalfundar skal boða með sannanlegum hætti með minnst 21 dags fyrirvara. Fundarboðið skal að lágmarki birt á vefsíðu félagsins, hengt upp á tilkynningatöflu félagsins og kynnt á Hugaraflsfundi. Óskað skal eftir framboðum, bæði til aðalstjórnar og varastjórnar, í fundarboði aðalfundar.

Allir þeir sem uppfylla skilyrði félagsaðildar Hugarafls eru velkomnir á aðalfund félagsins og hafa eitt atkvæði hver svo framarlega að skilyrði 5. greinar séu uppfyllt. Starfsmenn Hugarafls hafa málfrelsi og tillögurétt á aðalfundi rétt eins og félagsmenn Hugarafls.

Á fundinum gilda almenn fundarsköp og ræður meirihluti greiddra atkvæða niðurstöðu nema um lagabreytingar þá þarf 2/3 greiddra atkvæða.

7. grein

Dagskrá aðalfundar

Dagskrá aðalfundar skal í það minnsta innihalda:
Ávarp formanns, aðalfundur settur
Staðfest skipan fundarstjóra, fundarritara og tveggja atkvæðateljara
Staðfest lögmæti aðalfundarboðs
Skýrsla stjórnar
Ársreikningur síðasta árs kynntur og borinn upp til samþykktar
Lagabreytingar
Kosning stjórnar
Önnur mál
Fundarslit

Fundað í Hugarafli
8. grein

Breytingar og niðurlagning

Stjórnin tekur ákvarðanir um breytingar og niðurlagningu Hugarafls í samráði við Hugaraflshópinn.

Ef leggja skal Hugarafl niður þarf að halda tvo aðalfundi þar sem meirihluti tekur ákvörðun um niðurlagningu og fjármunir ef einhverjir eru í sjóði verður ráðstafað. Fénu verður ráðstafað til einstaklinga sem eru að vinna að geðheilbrigði sínu á einhvern hátt; valið verður á milli þess að styrkja einstaklinga sem sækja um til ákveðinna verkefna eða til að styrkja starf sem lýtur að starfi notenda á einhvern hátt. Fénu verður þannig ráðstafað í samræmi við markmið Hugarafls með samþykkt meirihluta.

9. grein

Verklagsreglur

Samhliða lögum Hugarafls eru gefnar út verklagsreglur sem eiga að vera öllum aðgengilegar og lýsa hvernig lögum þessum er fylgt. Kynna þarf verklagsreglur og samþykkja á Hugaraflsfundi til þess að þær taki gildi.