Innlent | mbl | 23.6.2014 | 15:18 | Uppfært 15:43
Kertafleyting á Reykjavíkurtjörn í tilefni Alþjóðlega geðverndardagsins. Geðraskanir eru helsta orsök örorku á Íslandi. mbl.is/Þorvaldur Örn Kristmundsson
Á síðasta ári var 17.121 Íslendingur skráður með 75% örorkumat hjá Tryggingastofnun. Geðraskanir voru algengasta fyrsta orsök örorku, hjá tæplega 38% einstaklinga. Það er aukning, því árið 2003 var hlutfallið 35%. Stoðkerfissjúkdómar voru önnur algengasta orsök örorku.
Þetta kemur fram í Ársskýrslu Tryggingastofnunar 2013, sem kom út í dag og er aðgengileg á netinu.
Fleiri konur en karlar
Fleiri konur en karlar eru með gilt örorkumat, 10.220 konur á móti 6.901 karli. Munur var einnig á dreifingu sjúkdómaflokka eftir kynjunum, því hjá körlum voru geðraskanir stærsti flokkurinn, en stoðkerfissjúkdómar hjá konum.
Einnig var munur á sjúkdómaflokkum eftir aldursbilum. Meðal ungs fólks undir 30 ára voru 1.566 einstaklingar með örorkumat og kynjahlutföllin nokkuð jöfn, 56% karlar og 44% konur. Geðraskanir voru algengasta orsök örorku í þessum aldurshópi, 70% hjá körlum undir 30 ára og 57% hjá konum.
Á aldrinum 30-49 ára voru alls 5.837 einstaklingar með gilt örorkumat á síðasta ári. Kynjahlutföllin voru 38,2% karlar og 61,8% konur. Rúmur helmingur karla var með örorku vegna geðraskana, en 43% kvenna.
Í aldurshópnum 50 ára og eldri voru stoðkerfissjúkdómar helsta orsök örorku hjá konum en geðraskanir hjá körlum. Meðal eldra fólks eru talsvert fleiri konur með gilt örorkumat, 60,8%, en 30,2% karlar.
Sjá einnig: Fimmti hver Íslendingur fékk greitt frá TM