Opið bréf til stjórnvalda frá Hugarafli
Vegna sumarlokana innlendrar neyðaraðstoðar. Hugarafl kallar stjórnvöld í þessu landi til ábyrgðar til að aðstoða fólk sem hefur nákvæmlega ekkert sér til hnífs og skeiðar.
Fjölskylduhjálpin, Mæðrastyrksnefnd og Hjálparstofnun Kirkjunnar eru sem kunnugt er að loka fyrir þjónustu sína um þessar mundir og stendur sú lokun fram í miðjan næsta mánuð. Hvert á fólk að leita sem hefur ekki fé til að kaupa mat og hefur þurft að reiða sig á þessa aðila? Og hefur ekki peninga fyrir einu né neinu.
Hugarafli er mjög umhugað um þessa einstaklinga og krefst úrlausnar. Við leggjum áherslu á að líkamleg og andleg heilsa fer saman og nauðsynlegt er fyrir góða andlega heilsu að líða ekki hungur og skort.
Við fögnum framtaki Reykjavíkurborgar en miklu betur má ef duga skal.
Fyrir hönd Hugarafls, Herdís Benediktsdóttir, notendafulltrúi
